چیف آف آرمی اسٹاف فیلڈ مارشل عاصم منیر کا کہناہے کہ پاک فوج بلوچستان کے عوام کے شانہ بشانہ کھڑی ہے۔
آئی ایس پی آر کے مطابق فیلڈ مارشل نے تربت کے دورے کے دوران سیکیورٹی صورتحال کا جائزہ لیا۔ اس موقع پر ان کے ہمراہ وزیر اعلی بلوچستان سرفراز بگٹی اور چیف سیکرٹری بلوچستان بھی موجود تھے۔
دورے کے دوران فیلڈ مارشل کو ترقیاتی منصوبوں، سول ملٹری اداروں کے درمیان مربوط روابط اور فتنہ الہندوستان کے خلاف جاری کامیاب آپریشنز سے آگاہ کیا گیا۔
آرمی چیف نے وزیراعلی بلوچستان اور سول انتظامیہ کے نمائندوں کے ساتھ ملاقات میں گڈ گورننس اور انفرا اسٹرکچر ڈویلپمنٹ کی اہمیت اجاگر کی۔ انہوں نے بلوچستان کے عوام کو درپیش چیلنجز سے نمٹنے کے لیے سول ملٹری مشترکہ کوششوں پر بھی زور دیا۔
آرمی چیف نے جنوبی بلوچستان کی سماجی و معاشی ترقی کے لیے بھرپور اور غیر متزلزل حمایت کا اعادہ کرتے ہوئے کہا کہ پاک فوج بلوچستان کے عوام کے شانہ بشانہ کھڑی ہے۔
فیلڈ مارشل عاصم منیر کا کہنا تھا کہ ترقی خوشحالی اور پائیدار ترقی کے لیے پاک فوج بلوچستان کے عوام کے ساتھ ہے۔
