ہندی فلموں کی مشہور اداکارہ اور بچن خاندان کی بہو ایشوریہ رائے کافی عرصے سے بڑے پردے سے دوری بنائے ہوئے ہیں۔ ابھی وہ اپنی بیٹی آردھیا کی پرورش پر پوری توجہ دے رہی ہیں۔ حالانکہ وہ کسی نہ کسی وجہ سے ہمیشہ سرخیوں میں بنی رہتی ہیں۔ اس درمیان ایشوریہ نے منگل کو دہلی ہائی کورٹ سے اپنے پرسنالٹی رائٹس کے تحفظ اور کچھ لوگوں کے ذریعہ ان کے نام، امیج اور اے آئی جنریٹیڈ فحش مواد کا استعمال روکنے کی اپیل کی ہے۔
ایشوریہ کا کہنا ہے کہ بغیر ان کی اجازت کے ان کی تصویروں کو کاروباری فائدے کے لیے استعمال کیا جا رہا ہے۔ اداکارہ نے عدالت سے اپنی شخصیت کے حقوق کے تحفظ کا مطالبہ کیا۔
انہوں نے اپنی درخواست میں کہا فیک عریاں تصویروں کا استعمال کاپی، مگ اور دیگر سامان فروخت کرنے کے لیے کیا گیا ہے۔ وہیں اسکرین شاٹس میں تصویروں کے ساتھ چھیڑ چھاڑ کی گئی، یہ سبھی اے آئی جنریٹیڈ ہیں۔
جسٹس تیجس کاریا نے زبانی طور سے اشارہ دیا کہ وہ مدعا الیہ کو وارننگ دیتے ہوئے ایک عبوری حکم جاری کریں گے۔
ایشوریہ کی طرف سے پیش سینئر وکیل ایڈوکیٹ سندیپ راٹھی نے کہا کہ اداکارہ اپنی تشہیر اور شخصیت کے حقوق کو نافذ کرنا چاہتی ہیں اور انہوں نے دلیل دی کہ کچھ پوری طرح سے غیر حقیقی اِنٹیمیٹ تصویریں انٹرنیٹ پر گردش کی جا رہی ہیں۔
سندیپ سیٹھی نے کہا کہ کسی کو بھی ان کی شبیہہ، یکسانیت یا شخصیت کا استعمال کرنے کا کوئی حق نہیں۔ لوگ صرف ان کا نام اور ان کا چہرہ لگا کر پیسہ بنا رہے ہیں۔ان کے نام اور ان کی شبیہہ کا استعمال کسی کی جسمانی خواہشات پوری کرنے کے لیے کی جا رہی ہے، یہ افسوسناک ہے۔
