سابق کپتان قومی کرکٹ ٹیم یونس خان نے قومی ٹیم پر کڑی تنقید کرتے ہوئے کہا ہے کہ کھلاڑی سیاست سے باہر نکلیں اور ٹیم کیلئے کھیلیں۔ اپنے لئے نہیں ملک و قوم کیلئے کھیلیں۔ شاہین شاہ آفریدی بیٹنگ کر سکتا ہے تو دوسرے کیوں نہیں
کراچی میں میڈیا سے گفتگو کے دوران یونس خان نے کہا کہ جیت کیلئے اچھا کھیلنا ضروری ہے، اچھی پلاننگ کے ذریعے میچز جیتے جاتے ہیں،، پاکستانی کرکٹ ٹیم میں مستقل مزاجی کا فقدان ہے۔تبدیلیوں سے گریز کریں اس سے کمبی نیشن خراب ہوتا ہے۔
یونس خان نے کہا کہ نہ بھارت کی ٹیم کمزور ہے اور نہ ہی پاکستان کی۔ بھارتی ٹیم میں تبدیلیاں کم ہوتی ہیں جو انکا مثبت پہلو ہے، بھارت کے کھلاڑیوں کو پتہ ہوتا ہے انہیں کھیلنا ہے۔
پاک بھارت ٹاکروں میں کشیدگی سے متعلق یونس خان نے کہا کہ سیاست اور کھیل کو الگ ہونا چاہئے ، بھارتی کرکٹرز کا ہاتھ نہ ملانا اسپورٹس مین اسپرٹ کے منافی ہے ، بھارتی ہاتھ نہیں ملا رہے لیکن آپ جیت کر انکے آگے ہاتھ بڑھائیں۔
یونس خان نے کہا کہ بھارتی کھلاڑی اپنی حکومت کی ہدایت پر ہم سے ہاتھ نہیں ملا رہے ، اگر ہماری حکومت بھی کہے کہ آپ نے ہاتھ نہیں ملانا تو شاید ہم بھی نہ ملائیں۔ ہمیں اپنی حکومت کی ہدایت پر عمل کرنا ہوگا۔ ہمیں ہاتھ ملانے یا نہ ملانے سے آگے نکلنا ہوگا، دنیا بہت آگے نکل چکی ہے۔
قومی ٹیم پر کڑی تنقید کرتے ہوئے سابق کپتان نے کہا کہ کھلاڑی سیاست سے باہر نکلیں اور ٹیم کیلئے کھیلیں۔ اپنے لئے نہیں ملک و قوم کیلئے کھیلیں۔ شاہین شاہ آفریدی بیٹنگ کر سکتا ہے تو دوسرے کیوں نہیں۔ وہ گرائونڈ میں کھیلتا ہوا نظر آرہا ہے۔ شاہین شاہ آفریدی میں آل راؤنڈر بننے کی صلاحیت ہے۔
