بھارتی گلوکار دلجیت دوسانجھ نے پہلگام حملے، پاکستانی اداکار ہانیہ عامر کے ساتھ اپنی فلم سردار جی 3 کے تنازع اور پاک بھارت کرکٹ مقابلوں پر حالیہ میچ پر اپنی خاموشی توڑ دی۔

ملائیشیا میں میوزک کنسرٹ کے دوران شرکاء سے گفتگو کرتے ہوئے کہا کہ جب فروری میں ان کی فلم سردار جی تھری کی شوٹنگ ہوئی تو پاکستان اور بھارت کے درمیان میچز کھیلے جا رہے تھے۔ اس کے بعد پہلگام کا المناک دہشت گردانہ حملہ ہوا۔ اس وقت، اور اب بھی ہم نے ہمیشہ دعا کی ہے کہ دہشت گردوں کو سخت سزا ملے۔

انہوں نے کہا کہ فرق یہ ہے کہ میری فلم کی شوٹنگ حملے سے پہلے کی گئی تھی، اور حملے کے بعد میچ کھیلا گیا۔

بھارتی گلوکار نے کہا کہ پہلگام حملوں کے بعد بھارتی میڈیا نے انہیں ملک دشمن کے طور پر پیش کرنے کی پوری کوشش کی، لیکن پنجابی اور سکھ برادری کبھی بھی قوم کے خلاف نہیں جا سکتی۔

دلجیت دوسانجھ نے کہا کہ میرے پاس بہت سے جواب تھے، لیکن میں نے خاموشی اختیار کی، سب کچھ اپنے اندر رکھا، جو کوئی بھی آپ کو کچھ کہے، آپ اس زہر کو اپنے اندر نہ لے جائیں۔ میں نے یہ زندگی سے سیکھا ہے، اس لیے میں نے کچھ نہیں کہا، کہنے کو بہت کچھ ہے، لیکن میں ایسا نہیں کرنا چاہتا۔