قومی ٹی 20 ٹیم کے کپتان سلمان علی آغا نے کہا ہے کہ میدان میں ہیڈ کوچ مائیک ہیسن مجھے پیغامات نہیں بھیجتے بلکہ میں خود فیصلے کرتا ہوں۔
راولپنڈی میں جنوبی افریقہ کیخلاف ٹی 20 سیریز سے قبل پریس کانفرنس کرتے ہوئے کپتان قومی کرکٹ ٹیم سلمان علی آغا نے کہا کہ ٹیم کی کارکردگی میں بہتری کی گنجائش موجود ہے، قومی ٹیم نے سہ ملکی سیریز جیتی اور ایشیا کپ کا فائنل کھیلا۔
ان کا کہنا تھا کہ ایشیا کپ 2025 میں کافی کچھ سیکھنے کو ملا، ایشیائی ایونٹ میں ہونے والی غلطیوں سے سیکھ کر ٹی 20 ورلڈکپ کی تیاری کریں گے، دوران میچ ہونے والی غلطیوں پر بات کرتے ہیں، کیونکہ ہم اُن غلطیوں کو دہرانا نہیں چاہتے۔ بطور کپتان ٹیم سلیکشن میں میرے رائے لی جاتی ہے، اندازہ ہے کہ میری کارکردگی ابھی اچھی نہیں، کوشش ہوتی ہے ٹیم کو میچ میں فتح دلا سکوں۔
بابراعظم کی واپسی پر سلمان علی آغا نے کہا کہ ٹاپ آرڈر بیٹر کے پاس 100 سے زائد ٹی 20 میچز کھیلنے کا تجربہ ہے، بابراعظم ورلڈ کلاس کھلاڑی ہیں، پاکستان ٹیم میں اُن کی شمولیت سے فائدہ ہوگا۔
انکا کہنا تھاکہ میری پہلی ترجیح بیٹنگ کی طرف ہوتی ہے، ٹی 20 میں ضرورت محسوس ہوئی تو باؤلنگ بھی کروں گا
