جاپان کے شہر کیوٹو میں مشہور گیم ڈیزائنر شیگیرو میاموتو نے انکشاف کیا ہے کہ انہوں نے کبھی تصور بھی نہیں کیا تھا کہ ان کا بنایا ہوا چھوٹا سا کردار ماریو دنیا بھر میں اتنا بڑا آئیکن بن جائے گا۔
فرانسیسی خبر رساں ادارے اے ایف پی کو دیے گئے انٹرویو میں شیگیرو میاموتو نے بتایا کہ 1980 کی دہائی میں جب ماریو کو پہلی بار متعارف کرایا گیا، تو وہ صرف 16 پکسلز پر مشتمل ایک سادہ سا کردار تھا۔ اس وقت تکنیکی پابندیوں نے ہی اس کے منفرد حلیے—جیسے مونچھیں اور ڈنگری—کو جنم دیا۔
انہوں نے کہا کہ آج کی جدید ٹیکنالوجی جہاں بے شمار امکانات فراہم کرتی ہے، وہیں تخلیقی چیلنجز بھی بڑھا دیتی ہے۔ جب کوئی حد نہ رہے تو ہر کوئی بنا سکتا ہے، لیکن ننٹینڈو ہمیشہ کچھ منفرد کرنا چاہتا ہے۔
ماریو کی نئی فلم دی سپر ماریو گلیکسی مووی دنیا بھر میں ریلیز ہو رہی ہے، جو 2023 کی بلاک بسٹر دی سپر ماریو برادرز مووی کا سیکوئل ہے۔ پہلی فلم نے 1.3 ارب ڈالر کا بزنس کیا تھا اور دنیا بھر میں دھوم مچا دی تھی۔
نئی فلم خلا میں ہونے والی مہمات پر مبنی ہے، جس میں زیرو گریویٹی کے مناظر اور شاندار ویژول ایفیکٹس شامل ہیں۔ اس بار فلم میں نہ صرف ایکشن بلکہ کہانی اور کرداروں کی گہرائی پر بھی خاص توجہ دی گئی ہے۔
فلم میں نئے کردار بھی شامل کیے گئے ہیں، جیسے یوشی اور فاکس میک کلاوڈ، جبکہ شہزادی پیچ کی ماضی کی کہانی کو بھی اجاگر کیا گیا ہے۔
ماضی میں 1993 کی ماریو فلم کی ناکامی کے بعد ننٹینڈو نے اپنے برانڈ پر سخت کنٹرول قائم کیا، اور اب وہ ہر پروجیکٹ میں فعال کردار ادا کر رہی ہے۔
شیگیرو میاموتو نے بتایا کہ فلم اور گیم بنانے کے عمل میں بڑا فرق ہے۔ “گیم میں ہم آخری وقت میں تبدیلی کر سکتے ہیں، مگر فلم میں ایسا ممکن نہیں،” انہوں نے کہا۔
دلچسپ بات یہ ہے کہ ماریو کی کامیابی کے بعد اب ننٹینڈو اپنی ایک اور مشہور فرنچائز دی لیجنڈ آف زیلڈا پر بھی فلم بنانے جا رہی ہے، جو 2027 میں ریلیز ہوگی۔
