پاکستان سپر لیگ (پی ایس ایل) سیزن 11 کی نئی فرنچائز حیدرآباد کنگزمین نے اپنی عمدہ فارم کو برقرار رکھتے ہوئے اسلام آباد یونائیٹڈ کو 6 وکٹوں سے شکست دے کر ایونٹ میں لگاتار دوسری فتح حاصل کر لی ہے۔

نیشنل اسٹیڈیم کراچی میں کھیلے گئے لیگ کے 21 ویں میچ میں حیدرآباد کنگزمین نے اسلام آباد یونائیٹڈ کی جانب سے دیا گیا 154 رنز کا ہدف 19 ویں اوور میں 4 وکٹوں کے نقصان پر حاصل کر لیا۔

اسلام آباد یونائیٹڈ نے مقررہ 20 اوورز میں 9 وکٹوں پر 153 رنز بنائے۔ ڈیون کانوے 45 اور مارک چپمین 42 رنز کے ساتھ نمایاں رہے۔

حیدرآباد کے بولر آصف محمود نے میچ کا پانسہ اس وقت پلٹا جب انہوں نے آخری اوور میں 4 وکٹیں حاصل کیں۔ محمد علی نے 2 اور میکسویل نے 1 کھلاڑی کو آؤٹ کیا۔

حیدرآباد کی فتح کے معمار کپتان اور اوپننگ بیٹر مارنس لبوشین رہے جنہوں نے 61 رنز کی ناقابلِ شکست اننگز کھیلی۔ دیگر بلے بازوں میں صائم ایوب نے 35 اور معاذ صداقت نے 30 رنز بنائے۔

ایک موقع پر عثمان خان (1) اور کوشل پریرا (2) کے جلد آؤٹ ہونے کے بعد ٹیم دباؤ کا شکار تھی، لیکن لبوشین نے گلین میکسویل (ناقابلِ شکست 21 رنز) کے ساتھ مل کر پانچویں وکٹ کے لیے 42 رنز کی شراکت قائم کی اور ٹیم کو جیت کی دہلیز پار کروائی۔

حیدرآباد کنگزمین نے اس سے قبل کراچی کو 4 وکٹوں سے شکست دے کر اپنی پہلی کامیابی حاصل کی تھی اور اب اس دوسری جیت کے بعد وہ پوائنٹس ٹیبل پر اپنی پوزیشن مستحکم کر رہے ہیں۔