امریکا نے گزشتہ ماہ خلیجِ عمان میں پکڑے گئے ایرانی جہاز کے عملے کو پاکستان منتقل کر دیا ہے، جہاں سے انہیں ایران واپس بھیجا جائے گا۔
امریکی فوج کی سینٹرل کمانڈ (سینٹ کوم) کے ترجمان کیپٹن ٹم ہاکنز کے مطابق جہاز ایم وی توسکا کے 22 عملے کے ارکان کو پاکستان منتقل کیا گیا ہے تاکہ ان کی واپسی کا عمل مکمل کیا جا سکے۔
یہ جہاز 20 اپریل کو اس وقت پکڑا گیا تھا جب وہ مبینہ طور پر ایران پر عائد امریکی بحری پابندیوں کی خلاف ورزی کی کوشش کر رہا تھا۔اس وقت جہاز کی تحویل اس کے اصل مالکان کو واپس منتقل کی جا رہی ہے۔
دوسری جانب ایران نے اس کارروائی کو سخت تنقید کا نشانہ بناتے ہوئے اسے سمندری قزاقی قرار دیا ہے۔
سینٹ کوم کے مطابق جہاز پر سوار مزید 6 افراد، جو عملے کے اہل خانہ بتائے جاتے ہیں، کو گزشتہ ہفتے ایک اور ملک منتقل کیا جا چکا ہے تاکہ انہیں بھی واپس بھیجا جا سکے۔
یہ واقعہ خطے میں پہلے سے موجود کشیدگی میں مزید اضافہ کر سکتا ہے، خصوصاً ایسے وقت میں جب خلیجِ عمان اور مشرقِ وسطیٰ میں سکیورٹی صورتحال پہلے ہی غیر یقینی کا شکار ہے۔
