لاہور: آئی سی سی کے اپیل پینل نے لاہور کے گداّفی اسٹیڈیم کی پچ سے متعلق عائد ڈی میرٹ پوائنٹ ختم کر دیا ہے۔ پچ کو جون میں پاکستان اور آسٹریلیا کے درمیان تیسرے ون ڈے کے دوران غیر تسلی بخش قرار دیتے ہوئے قذاّفی اسٹیڈیم کو پہلی مرتبہ ڈی میرٹ پوائنٹ دیا گیا تھا۔
آئی سی سی کے مطابق اپیل پینل نے میچ کی ویڈیو فوٹیج، میچ ریفری کی رپورٹ اور دونوں ٹیموں کے مؤقف کا جائزہ لینے کے بعد فیصلہ کیا کہ پچ پر ضرورت سے زیادہ ناہمواری یا اسپن نہیں تھی، اس لیے عائد کی گئی سزا واپس لے لی گئی۔
پاکستان اور آسٹریلیا کے درمیان تیسرے ون ڈے میں پچ نے اسپنرز کو نمایاں مدد فراہم کی تھی۔ کم اسکور والے میچ میں آسٹریلیا کی ٹیم 42 اوورز میں صرف 157 رنز پر آؤٹ ہوگئی تھی، جس کے بعد پاکستان نے چار وکٹوں سے کامیابی حاصل کی تھی۔
اس میچ میں دونوں ٹیموں میں سے کوئی بھی 200 رنز کا ہندسہ عبور نہیں کرسکی تھی۔ میچ ریفری گریم لابروئے نے پچ کو ’’غیر تسلی بخش‘‘ قرار دیتے ہوئے اسے سست اور کم باؤنس والی قرار دیا تھا، جس کے باعث رنز بنانا مشکل ہوگیا تھا اور اسپنرز کو ابتدائی اوورز سے ہی مدد مل رہی تھی۔
پاکستان کرکٹ بورڈ نے اس وقت آئی سی سی کے فیصلے کے خلاف اپیل پر غور کرنے کا اعلان کیا تھا۔ اب اپیل پینل کے فیصلے کے بعد گداّفی اسٹیڈیم پر عائد ڈی میرٹ پوائنٹ ختم ہوگیا ہے۔
یہ دوسری مرتبہ ہے کہ پاکستان کرکٹ بورڈ نے آئی سی سی کی جانب سے پچ سے متعلق عائد پابندی یا ڈی میرٹ پوائنٹ کے خلاف کامیابی حاصل کی ہے۔ اس سے قبل دسمبر 2022 میں راولپنڈی کرکٹ اسٹیڈیم کی پچ پر انگلینڈ کے خلاف ٹیسٹ میچ کے حوالے سے دیا گیا ڈی میرٹ پوائنٹ بھی اپیل کے بعد ختم کر دیا گیا تھا۔
قذافی اسٹیڈیم رواں سال اکتوبر میں پاکستان، سری لنکا اور انگلینڈ پر مشتمل سہ ملکی سیریز کے چار ون ڈے میچز کی میزبانی کرے گا، جبکہ نومبر میں سری لنکا کے خلاف دوسرے ٹیسٹ کی میزبانی بھی لاہور کو کرنی ہے۔
دوسری جانب کینیڈا کے میپل لیف کرکٹ گراؤنڈ سے متعلق اپیل پینل نے تین ڈی میرٹ پوائنٹس برقرار رکھنے کا فیصلہ کیا ہے۔ تاہم اسی سیریز میں 8 جون کو امریکا اور نیدرلینڈز کے درمیان میچ کی پچ سے متعلق اپیل منظور کرتے ہوئے اسے تسلی بخش قرار دیا گیا
