لندن: پاکستان کے اوپننگ بلے باز امام الحق کی انگلینڈ کے خلاف لارڈز ٹیسٹ کے بقیہ میچ میں شرکت تقریباً ناممکن ہوگئی ہے۔ امام الحق کی بائیں پنڈلی میں گریڈ ون ٹئیر کی تشخیص ہوئی ہے اور انہیں صحت یابی کے لیے تقریباً 10 دن آرام کا مشورہ دیا گیا ہے۔
رپورٹس کے مطابق امام الحق کو لارڈز ٹیسٹ کے پہلے روز کھیل کے اختتام پر اسکین کے لیے لے جایا گیا، جس کے بعد انجری کی نوعیت سامنے آئی۔ وہ پہلے دن چائے کے وقفے کے بعد میدان میں واپس نہیں آئے اور اس کے بعد سے اس ٹیسٹ میں ایکشن سے باہر ہیں۔ ان کی جگہ سلمان علی آغا نے متبادل کھلاڑی کے طور پر ذمہ داری سنبھالی۔
پاکستان کی پہلی اننگز صرف 110 رنز پر سمٹ گئی۔ انگلینڈ نے پہلی اننگز میں 290 رنز بنائے تھے۔
امام الحق کو انجری دراصل ہیڈنگلے ٹیسٹ کے دوران بیٹنگ کرتے ہوئے ہوئی تھی۔ اس وقت بھی انہیں میدان میں طبی امداد دی گئی اور ان کی بائیں پنڈلی پر پٹی باندھی گئی تھی۔ انہوں نے اس اننگز میں 42 رنز بنائے اور عبداللہ شفیق کے ساتھ تیسری وکٹ کے لیے 91 رنز کی شراکت قائم کی، تاہم پاکستان کی پوری ٹیم 171 رنز پر آؤٹ ہوگئی۔
پاکستانی ٹیم پہلے ہی لارڈز ٹیسٹ میں شدید مشکلات سے دوچار ہے۔ تیسرے دن کے اختتام پر انگلینڈ کو 357 رنز کی برتری حاصل ہے اور پاکستان کو سیریز برابر کرنے کے لیے مشکل ہدف کا سامنا ہے۔
اگر انگلینڈ لارڈز ٹیسٹ جیت لیتا ہے تو وہ دسمبر 2024 کے بعد پہلی مرتبہ ٹیسٹ سیریز جیتے گا۔ پاکستان کے لیے یہ بیرونِ ملک آخری 10 ٹیسٹ میچوں میں نویں شکست بھی ہوگی۔
پاکستان اور انگلینڈ کے درمیان سیریز کا تیسرا اور آخری ٹیسٹ 9 ستمبر کو برمنگھم میں شروع ہوگا، اس لیے امام الحق کے پاس انجری سے صحت یاب ہونے کے لیے تقریباً 10 دن کا وقت موجود ہوگا۔
