کراچی: گورنمنٹ گرلز سیکنڈری اسکول، ٹاؤن کمیٹی نیو کراچی میں جشنِ میلاد النبی حضرت محمد مصطفیٰ ﷺ کے سلسلے میں ایک پروقار تقریب کا انعقاد کیا گیا۔
تقریب میں طالبات نے بارگاہِ رسالت ﷺ میں نہایت عقیدت کے ساتھ نعتیں پیش کیں اور محبتِ رسول ﷺ کا اظہار کیا۔ نعت خوانی کے دوران اسکول کا ماحول روحانیت اور درود و سلام کی صداؤں سے گونجتا رہا۔
تقریب میں ڈسٹرکٹ ایجوکیشن آفیسر ای ایس اینڈ ایچ ایس ڈسٹرکٹ سینٹرل کراچی سید نواز علی شاہ جیلانی اور ڈپٹی ڈی ای او طارق علی نے خصوصی شرکت کی۔
میلاد النبی ﷺ کی بابرکت محفل سید نواز علی شاہ جیلانی کی نگرانی اور ہیڈ مسٹریس محترمہ غزالہ یاسمین کی سربراہی میں منعقد ہوئی۔ طالبات کی عقیدت اور جوش نے اس روح پرور محفل کو چار چاند لگا دیے۔ طالبات نے آقائےدوجہاں کےحضور نذرانہ عقیدت پیش کیا۔
اس موقع پر مقررین کا کہنا تھا کہ اس طرح کی تقریبات کا مقصد نئی نسل کو سیرتِ طیبہ ﷺ سے روشناس کرانا ہے تاکہ ان کے دلوں میں عشقِ رسول ﷺ، دینی شعور اور اسلامی اقدار اجاگر ہوں۔
منتظمین نے کہا کہ اس نوعیت کی تقاریب طالبات کی دینی و اخلاقی تربیت کے ساتھ ساتھ سیرتِ طیبہ ﷺ سے وابستگی کو فروغ دیتی ہیں ۔
