راولپنڈی: پاکستان نے پہلے ٹی ٹوئنٹی انٹرنیشنل میں شاندار بیٹنگ کی بدولت سری لنکا کو چار وکٹوں سے شکست دے کر تین میچوں کی سیریز میں 0-1 کی برتری حاصل کر لی۔ 183 رنز کے ہدف کا تعاقب کرتے ہوئے قومی ٹیم نے آخری اوورز میں اعصاب شکن مقابلے کے بعد 19ویں اوور کی پانچویں گیند پر کامیابی اپنے نام کر لی۔
پاکستان کی جیت میں کپتان صاحبزادہ فرحان اور معاذ صداقت نے مرکزی کردار ادا کیا۔ دونوں بلے بازوں نے دوسری وکٹ کے لیے 92 رنز جوڑ کر سری لنکن بولرز کو دباؤ میں رکھا اور میچ کا پانسہ پلٹ دیا۔
صاحبزادہ فرحان نے جارحانہ انداز اپناتے ہوئے 53 گیندوں پر 89 رنز بنائے۔ ان کی اننگز میں 10 چوکے اور چار چھکے شامل تھے۔ دوسری جانب معاذ صداقت نے صرف 29 گیندوں پر 50 رنز کی برق رفتار اننگز کھیلی، جس میں چار چوکے اور تین چھکے شامل تھے۔
اس سے قبل فخر زمان اور صاحبزادہ فرحان نے پہلی وکٹ کے لیے 50 رنز کی شراکت قائم کی۔ فخر زمان 21 رنز بنا کر آؤٹ ہوئے، تاہم بعد میں آنے والے بلے بازوں نے ہدف کی جانب پیش قدمی جاری رکھی۔ آخری لمحات میں سری لنکا نے وکٹیں حاصل کرکے مقابلہ دلچسپ بنا دیا، لیکن خواجہ نافع نے ایشان ملنگا کی گیند پر چھکا لگا کر پاکستان کو فتح دلا دی۔
اس سے پہلے سری لنکا نے ٹاس جیت کر پہلے بیٹنگ کرتے ہوئے مقررہ اوورز میں 182 رنز بنائے۔ ابتدائی وکٹیں جلد گرنے کے باوجود لاہیرو اُدارا نے پاکستانی بولرز کے خلاف بھرپور مزاحمت کی اور 55 گیندوں پر 91 رنز کی عمدہ اننگز کھیلی۔ ان کے بیٹ سے 11 چوکے اور ایک چھکا نکلا، تاہم وہ سنچری مکمل نہ کر سکے۔
کامندو مینڈس نے 23 جبکہ داسن شاناکا نے 18 رنز بنائے۔ پاکستان کی جانب سے نسیم شاہ نے تین وکٹیں حاصل کیں، جبکہ ڈیبیو کرنے والے محمد عمران نے دو کھلاڑیوں کو آؤٹ کیا۔ صائم ایوب، شاداب خان اور رضا اللہ نے بھی ایک، ایک وکٹ حاصل کی۔
سری لنکا کی جانب سے مہیش تھیکشنا اور ایشان ملنگا نے دو، دو وکٹیں حاصل کیں، تاہم پاکستانی بیٹرز کی جارحانہ حکمت عملی مہمان ٹیم کی بولنگ پر بھاری پڑی۔
تین میچوں کی سیریز کا دوسرا اور تیسرا ٹی ٹوئنٹی 11 اور 13 اکتوبر کو راولپنڈی میں کھیلا جائے گا۔
