بھارتی اداکارہ ہیما مالنی نے آنجہانی نانا پاٹیکر کے ساتھ آخری رابطے کا ذکر کرتے ہوئے کہا ہے کہ ان کے انتقال کی خبر سے گہرا صدمہ ہوا ہے۔
بالی ووڈ کے معروف اداکار نانا پاٹیکر کے انتقال کی خبر پر سینئر اداکارہ ہیما مالنی نے بھی افسوس کا اظہار کیا ہے۔ ہیما مالنی کے مطابق نانا پاٹیکر نے انتقال سے چند روز قبل انہیں فون کیا تھا، تاہم وہ سفر میں ہونے کی وجہ سے ان کی کال موصول نہیں کر سکیں، جس کا انہیں اب افسوس ہے۔
بھارتی خبر رساں ادارے آئی اے این ایس سے گفتگو کرتے ہوئے ہیما مالنی نے بتایا کہ ان کی نانا پاٹیکر سے کسی فلم میں ایک ساتھ کام کرنے کی نوبت تو نہیں آئی، لیکن دونوں کے درمیان رابطہ رہتا تھا۔
ہیما مالنی نے نانا پاٹیکر کی اداکاری کو سراہتے ہوئے کہا کہ ہندی اور مراٹھی فلم انڈسٹری نے ایک بڑے فنکار کو کھو دیا ہے۔ ان کے بقول نانا پاٹیکر بذاتِ خود اداکاری کا ایک مکمل ادارہ تھے، جنہوں نے اپنی منفرد صلاحیتوں سے فلمی دنیا میں الگ مقام بنایا۔
اداکارہ نے سوشل میڈیا پلیٹ فارم ایکس پر بھی نانا پاٹیکر کو خراجِ عقیدت پیش کیا۔ انہوں نے اپنے پیغام میں ان کی شاندار اداکاری، ہندی اور مراٹھی سینما کے لیے خدمات اور کسانوں و محروم طبقوں کی مدد کے لیے ان کی فلاحی سرگرمیوں کا ذکر کیا۔
ہیما مالنی کے مطابق نانا پاٹیکر کی فلمیں اور کردار ان کی غیر معمولی صلاحیتوں کی یاد دلاتے رہیں گے، جبکہ فلمی صنعت ان کی کمی محسوس کرے گی۔
