ٹرینیڈاڈ کے شہر ٹاروبا میں کھیلے جا رہے پہلے تاریخی ٹیسٹ میچ کے تیسرے روز 14 وکٹیں گریں اور مقابلہ انتہائی دلچسپ مرحلے میں داخل ہوگیا۔ دن کے اختتام پر ویسٹ انڈیز نے اپنی دوسری اننگز میں 7 وکٹوں کے نقصان پر 126 رنز بنا لیے ہیں اور اسے پاکستان پر مجموعی طور پر 155 رنز کی برتری حاصل ہے۔
پاکستان نے تیسرے روز اپنی پہلی اننگز 282 رنز پر ختم کی۔ کپتان شان مسعود نے شاندار 109 رنز کی اننگز کھیل کر ٹیم کو سہارا دیا جبکہ امام الحق نے 63 رنز بنائے۔ تاہم ویسٹ انڈیز کے آل راؤنڈر جسٹن گریوز نے غیرمعمولی بولنگ کا مظاہرہ کرتے ہوئے کیریئر کی پہلی پانچ وکٹیں حاصل کیں اور 27 رنز دے کر 5 کھلاڑیوں کو آؤٹ کیا۔
پاکستان نے دن کا آغاز نسبتاً مستحکم انداز میں کیا تھا، جہاں شان مسعود اور سلمان علی آغا نے ذمہ دارانہ بیٹنگ کرتے ہوئے ٹیم کو مضبوط پوزیشن میں پہنچایا۔ مسعود نے اپنی ٹیسٹ کیریئر کی ساتویں سنچری مکمل کی، لیکن اس کے بعد میچ کا رخ اچانک بدل گیا۔
ویسٹ انڈیز کے فاسٹ بولر شَمار جوزف نے پہلے سلمان علی آغا کو شاندار گیند پر بولڈ کیا، جس کے فوراً بعد جسٹن گریوز نے شان مسعود کو بولڈ کر کے پاکستان کو بڑا دھچکا پہنچایا۔ اس کے بعد پاکستان کی نچلی بیٹنگ لائن شدید دباؤ کا شکار ہوگئی۔ عامر جمال، علی عثمان اور محمد رضوان بھی گریوز کی عمدہ بولنگ کے سامنے زیادہ دیر نہ ٹھہر سکے، یوں پاکستان کی پوری ٹیم 282 رنز پر آؤٹ ہوگئی۔
ویسٹ انڈیز کو دوسری اننگز میں 29 رنز کی برتری حاصل تھی، لیکن پاکستان کے تجربہ کار فاسٹ بولر محمد عباس نے نئی گیند سے ایک مرتبہ پھر اپنی کلاس دکھاتے ہوئے میزبان ٹیم کی مضبوط آغاز کی امیدیں خاک میں ملا دیں۔
عباس نے صرف سات اوورز کے شاندار اسپیل میں برینڈن کنگ اور کیوم ہوج کو آف اسٹمپ کے باہر مسلسل درست لائن پر بولنگ کرتے ہوئے پویلین بھیجا، جبکہ محمد علی نے امیر جانگو کا شاندار ریٹرن کیچ لے کر ویسٹ انڈیز کو 30 رنز پر تیسرا نقصان پہنچایا۔
بعد ازاں شائی ہوپ نے جارحانہ انداز اپنانے کی کوشش کی، تاہم خرم شہزاد کی اندر آتی گیند پر بڑا شاٹ کھیلنے کی کوشش میں اپنی وکٹ گنوا بیٹھے۔ اس کے بعد ٹیگنارائن چندرپال اور جسٹن گریوز نے 37 رنز کی مزاحمتی شراکت قائم کر کے ٹیم کو سنبھالا، لیکن عامر جمال نے چندرپال کو آؤٹ کر کے پاکستان کو ایک اور اہم کامیابی دلائی۔
محمد عباس اور خرم شہزاد نے بعد میں جسٹن گریوز اور روسٹن چیز کی وکٹیں بھی حاصل کیں، تاہم ویسٹ انڈیز کے جارح مزاج فاسٹ بولر شَمار جوزف نے نچلے نمبروں پر دلیرانہ بیٹنگ کرتے ہوئے عامر جمال کو تین چھکے رسید کیے اور ٹیم کی برتری 150 رنز سے آگے پہنچا دی۔
