ایشین گیمز 2026 کے فائنل میں بھارت کے خلاف 96 رنز کی شاندار اننگز کھیلنے والے پاکستانی بلے باز حسن نواز ایک پرانے بیان کے باعث دوبارہ خبروں میں آگئے ہیں۔
سوشل میڈیا پر حسن نواز کا ایک پرانا ویڈیو کلپ وائرل ہورہا ہے، جس میں وہ بھارتی بولرز کے حوالے سے سخت تبصرہ کرتے دکھائی دیتے ہیں۔
وائرل ویڈیو میں میزبان حسن نواز سے سوال کرتا ہے کہ دنیا کا کون سا فاسٹ بولر ایسا ہے جسے وہ میدان میں آتے ہی نشانہ بنانا چاہتے ہیں؟ جواب میں حسن نواز کسی ایک بولر کا نام لینے کے بجائے بھارتی ٹیم کا حوالہ دیتے ہوئے کہتے ہیں کہ انہیں بھارت کے ہر بولر سے نفرت ہے۔
تاہم یہ واضح رہے کہ یہ بیان ایشین گیمز 2026 کے فائنل کے دوران نہیں دیا گیا تھا بلکہ ایک پرانے انٹرویو کا حصہ ہے۔ فائنل میں حسن نواز نے بھارت کے خلاف 51 گیندوں پر 96 رنز کی دھواں دار اننگز کھیلی، جس میں 5 چوکے اور 7 چھکے شامل تھے۔
پاکستان کو فتح کے لیے 212 رنز کا ہدف ملا تھا، تاہم پاکستانی ٹیم مقررہ 20 اوورز میں 192 رنز بناسکی۔ حسن نواز آخری گیند پر آؤٹ ہوئے اور اپنی سنچری سے صرف 4 رنز دور رہ گئے۔ بھارت نے یہ مقابلہ 19 رنز سے جیت کر گولڈ میڈل اپنے نام کیا۔
حسن نواز کی شاندار اننگز کے بعد ان کا پرانا ویڈیو سامنے آنے سے بھارتی بولرز سے متعلق ان کا بیان ایک بار پھر سوشل میڈیا پر بحث کا موضوع بن گیا ہے۔
