ٹیکنالوجی کمپنی ایپل آئندہ برس آئی فون کی دو دہائیوں کی تکمیل کے موقع پر کئی جدید مصنوعات متعارف کرانے کی تیاری کر رہی ہے۔ میڈیا رپورٹس کے مطابق کمپنی پہلی مرتبہ ایسے ایئرپوڈز پیش کرنے کا ارادہ رکھتی ہے جن میں کیمرہ اور مصنوعی ذہانت پر مبنی نئی صلاحیتیں شامل ہوں گی۔
بلومبرگ کی رپورٹ کے مطابق ان ایئرپوڈز کے ڈنڈے نما حصے میں چھوٹے کیمرے نصب کیے جائیں گے، جو صارف کے اردگرد کے ماحول سے بصری معلومات حاصل کر کے سری کو فراہم کریں گے۔ اس کے نتیجے میں وائس اسسٹنٹ صارف کے سوالات کے زیادہ درست اور حالات کے مطابق جوابات دینے کے قابل ہو جائے گا، جبکہ نیویگیشن اور اردگرد موجود اشیا کے بارے میں مزید تفصیلی معلومات بھی فراہم کی جا سکیں گی۔
کمپنی ان نئے ایئرپوڈز کی آزمائش آئندہ نسل کے آپریٹنگ سسٹم آئی او ایس 28 کے ساتھ کر رہی ہے۔ ایپل بیک وقت کئی مصنوعی ذہانت سے مزین ڈیوائسز کی تیاری میں مصروف ہے، جن کی تجارتی دستیابی کے اوقات میں معمولی ردوبدل ممکن ہے۔
رپورٹس میں بتایا گیا ہے کہ ابتدائی منصوبوں کے تحت یہ مصنوعات جلد متعارف کرانے کا ارادہ تھا، تاہم مصنوعی ذہانت کے فیچرز کو مزید بہتر بنانے اور بصری شناختی نظام کی کارکردگی کو مضبوط بنانے کے لیے ان کی رونمائی کو 2027 تک مؤخر کر دیا گیا ہے۔
ایپل اسی عرصے میں نئے انداز کے آئی فون، دوسری نسل کے فولڈیبل آئی فون اور اپنے پہلے اسمارٹ چشموں کو بھی متعارف کرا سکتی ہے۔ ماہرین کا خیال ہے کہ یہ مصنوعات مل کر مصنوعی ذہانت سے چلنے والے ویئرایبل ڈیوائسز کے ایک مربوط نظام کی بنیاد رکھ سکتی ہیں۔
