پاکستانی اداکار جاوید شیخ نے بالی ووڈ سپر اسٹار شاہ رخ خان کے ساتھ کام کرنے کے تجربے کو شاندار قرار دیتے ہوئے کہا ہے کہ بھارت کی مہمان نوازی، انکساری اور فراخ دلی کو الفاظ میں بیان کرنا مشکل ہے۔
ایک نجی ٹی وی پروگرام میں گفتگو کرتے ہوئے جاوید شیخ نے بتایا کہ شاہ رخ خان کی عاجزی اور خوش اخلاقی نے انہیں بہت متاثر کیا۔ ان کے مطابق فلم کی شوٹنگ کے دوران شاہ رخ خان کا رویہ ہمیشہ عزت اور محبت پر مبنی رہا۔
جاوید شیخ نے بتایا کہ فلم کی ہدایت کار فرح خان نے انہیں شاہ رخ خان کے والد کے کردار کے لیے ذاتی طور پر پیشکش کی تھی۔ جب پروڈکشن ٹیم نے معاہدے کے لیے رابطہ کیا تو انہوں نے معاوضہ لینے سے انکار کر دیا۔
ان کا کہنا تھا کہ اتنی بڑی بالی ووڈ فلم میں اہم کردار کے لیے منتخب ہونا ہی ان کے لیے اعزاز تھا، جبکہ اس فلم میں پاکستان کی نمائندگی کرنا کسی بھی مالی معاوضے سے زیادہ اہم تھا۔
جاوید شیخ کے مطابق جب پروڈکشن ٹیم نے کہا کہ ایک پیشہ ور فنکار کو معاوضہ ضرور ملنا چاہیے تو انہوں نے مذاقاً کہا کہ وہ صرف ایک روپیہ بطور معاوضہ قبول کریں گے۔ ان کے اس جواب پر فرح خان اور شاہ رخ خان بھی حیران رہ گئے۔
اداکار نے بتایا کہ فلم سازوں نے ان کے جذبے اور خلوص کو سراہا، تاہم انہیں صرف علامتی معاوضے پر کام کرنے کی اجازت نہیں دی گئی بلکہ انہیں ایسا معاوضہ دیا گیا جو ان کی توقعات سے بھی زیادہ تھا۔
