پاکستان اور ویسٹ انڈیز کے درمیان جاری دوسرے ٹیسٹ میچ کے پہلے روز کا کھیل بارش اور خراب روشنی سے متاثر رہا، تاہم کھیل کے اختتام تک میزبان ویسٹ انڈیز نے پہلی اننگز میں 5 وکٹوں کے نقصان پر 239 رنز بنا کر مضبوط پوزیشن حاصل کر لی۔
دن کے اختتام پر جسٹن گریوز 64 رنز اور روسٹن چیس 36 رنز کے ساتھ کریز پر موجود ہیں اور دوسرے روز اپنی ٹیم کے اسکور کو مزید مستحکم بنانے کی کوشش کریں گے۔ اس سے قبل برینڈن کنگ 46 رنز بنا کر نمایاں بلے باز رہے، تاہم نصف سنچری مکمل نہ کر سکے۔
پاکستانی بولرز نے وقفے وقفے سے کامیابیاں حاصل کر کے ویسٹ انڈیز کو بڑی شراکتیں قائم کرنے سے روکے رکھا۔ محمد علی سب سے کامیاب بولر رہے جنہوں نے 2 وکٹیں حاصل کیں، جبکہ عبید شاہ، علی عثمان اور ساجد خان نے ایک، ایک کھلاڑی کو آؤٹ کیا۔
بارش اور خراب روشنی کے باعث پہلے روز کھیل کئی مرتبہ روکا گیا، جس کے نتیجے میں مقررہ اوورز مکمل نہ ہو سکے اور صرف 74 اوورز کا کھیل ممکن ہو سکا۔
اب دوسرے روز پاکستان کی نظریں ویسٹ انڈیز کی باقی ماندہ وکٹیں جلد حاصل کر کے پہلی اننگز میں برتری حاصل کرنے پر ہوں گی، جبکہ میزبان ٹیم اپنی اننگز کو بڑے مجموعے تک پہنچانے کی کوشش کرے گی۔
