ویسٹ انڈیز کو آسٹریلیا کے خلاف ٹیسٹ میچ میں تاریخی شکست کا سامنا کرناپڑا ہے۔ ٹیسٹ کرکٹ کی تاریخ میں جو کبھی نہیں ہوا ایسا شرمناک ریکارڈ بھی کالی آندھی کےنام ہوا ہے۔
جمیکا ٹیسٹ میں آسٹریلیا نے جیت کے لیے ویسٹ انڈیز کو 204 رنوں کا ہدف دیا تھا۔ اس چھوٹے سے ہدف کے تعاقب میں مچل اسٹارک اور اسکاٹ بولینڈ کی گیند بازی کے سامنے ویسٹ انڈیز کی ٹیم تاش کے پتوں کی طرح بکھر گئی۔ پوری ٹیم 27 رن کے معمولی اسکور پر آل آؤٹ ہو گئی، جو ٹیسٹ کی تاریخ میں ویسٹ انڈیز کا سب سے چھوٹا اور مجموعی طور پر دوسرا سب سے چھوٹا اسکور رہا۔
آسٹریلیا کے فاسٹ بولر مچل اسٹارک کو مین آف دی میچ اور مین آف دی سیریز کا خطاب دیا گیا۔ ویسٹ انڈیز ٹیم کی دوسری اننگ کو 27 رن پر سمیٹنے میں اسٹارک کا اہم کردار رہا، انہوں نے 6 وکٹ لے کر ٹیسٹ کرکٹ میں سب سے تیز 5 وکٹ (صرف 15 گیندوں میں) لینے کا ریکارڈ اپنے نام درج کر لیا۔
اسٹارک سے قبل یہ ریکارڈ مشترکہ طور پر آسٹریلیا کے ایرنی ٹوشیک (1947)، انگلینڈ کے اسٹورٹ براڈ اور آسٹریلیا کے اسکاٹ بولینڈ کے نام ہے، ان تینوں نے 19-19 گیندوں پر 5 وکٹ حاصل کیے تھے۔
دوسری اننگ میں 6 وکٹ لینے والے مچل اسٹارک نے ٹیسٹ کرکٹ میں 400 وکٹ بھی مکمل کر لیے۔ انہوں نے اپنے ٹیسٹ کیریئر کی 19062 ویں گیند پر یہ کارنامہ انجام دیا۔ ڈیل اسٹین کے بعد گیندوں کے لحاظ سے سب سے تیز 400 وکٹ لینے والے وہ دوسرے گیند باز ہیں۔
ان کے علاوہ اسکاٹ بولینڈ نے اپنے ٹیسٹ کیریئر کی ہیٹ ٹرک لے کر ریکارڈ قائم کیا۔ ٹیسٹ میں یہ کارنامہ انجام دینے والے وہ آسٹریلیا کے 10ویں جبکہ دنیا کے 45 ویں گیند باز بن گئے۔
ٹیسٹ کرکٹ کی ایک اننگ میں سب سے کم اسکور بنانے کا عالمی ریکارڈ نیوزی لینڈ کے نام ہے۔ 1955 میں انگلینڈ کے خلاف ٹیسٹ میچ کی ایک اننگ میں نیوزی لینڈ نے صرف 26 رن بنائے تھے۔
