چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر کا کہنا ہے کہ اسلامی ریاست میں ریاست کےعلاوہ کوئی جہاد کا حکم نہیں دے سکتا ۔
اسلام آباد میں قومی علما و مشائخ کانفرنس سے خطاب کرتے ہوئے چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے کہا ہے کہ ریاستِ طیبہ اور ریاستِ پاکستان کا تعلق انتہائی گہرا اور روحانی بنیادوں پر قائم ہے۔ انہوں نے کہا کہ پاکستان اور مسلم دنیا کے درمیان دفاعی تعاون اب ایک تاریخی معاہدے کی صورت اختیار کر چکا ہے۔
فیلڈ مارشل عاصم منیر نے کہا کہ اللہ تعالیٰ نے تمام مسلم ممالک میں سے محافظینِ حرمین کا اعزاز پاکستان کو دیا ہے، جو ہمارے لیے فخر کے ساتھ ایک بڑی ذمہ داری بھی ہے۔ انہوں نے علم و تحقیق کی اہمیت پر زور دیتے ہوئے کہا کہ جس قوم نے قلم اور دانش کو چھوڑا، وہاں انتشار اور فساد نے جنم لیا۔ ان کے مطابق ترقی، طاقت اور عزت محنت، علم اور اتحاد کے ذریعے حاصل ہوتی ہے، تقسیم کے ذریعے نہیں۔
اپنے خطاب میں انہوں نے واضح کیا کہ اسلامی ریاست میں جہاد کا اعلان صرف ریاست کا اختیار ہے، کوئی فرد یا گروہ اس کا حق نہیں رکھتا۔ انہوں نے بھارت کو دہشت گردی کو فروغ دینے والا ملک قرار دیتے ہوئے کہا کہ ’’پاکستان دشمن کو چھپ کر نہیں بلکہ للکار کر جواب دیتا ہے۔‘‘
فیلڈ مارشل عاصم منیر نے علما و مشائخ سے اپیل کی کہ وہ قوم کو متحد رکھیں، فکری ہم آہنگی کو بڑھائیں اور نوجوان نسل کی رہنمائی میں اپنا کردار مزید مضبوط کریں۔
تقریب کے اختتام پر انہوں نے بلند آواز میں “پاکستان ہمیشہ زندہ باد” کا نعرہ لگایا۔
