وزارتِ اوورسیز پاکستانیز کی خصوصی کوششوں کے نتیجے میں پاکستانی محنت کشوں کے لیے یورپ کے دروازے کھل گئے ہیں۔ ترجمان وزارت اوورسیز پاکستانیز کے مطابق اٹلی نے پاکستان کو نوکریوں کے لیے مجموعی طور پر 10 ہزار 500 افراد کا کوٹہ الاٹ کر دیا ہے۔
ترجمان کے مطابق اٹلی نے یہ کوٹہ آئندہ تین سال کے لیے مختص کیا ہے، جس کے تحت ہر سال 3 ہزار 500 پاکستانی ورکرز اٹلی جا سکیں گے۔ ان میں 1500 افراد سیزنل جبکہ 2 ہزار نان سیزنل کوٹہ کے تحت روزگار حاصل کریں گے۔
یہ کامیابی وفاقی وزیر اوورسیز پاکستانیز چوہدری سالک حسین کی خصوصی درخواست اور مسلسل سفارتی کوششوں کا نتیجہ ہے۔ اٹلی نے پاکستان کو شپ بریکنگ، ہاسپٹیلیٹی، ہیلتھ کیئر اور زراعت کے شعبوں میں روزگار کے مواقع فراہم کیے ہیں۔
ان شعبوں میں ہنرمند اور نیم ہنرمند پاکستانی ورکرز کو ترجیح دی جائے گی۔ اٹلی میں ویلڈرز، ٹیکنیشنز، شیف، ویٹرز، ہاؤس کیپنگ اسٹاف، نرسنگ، میڈیکل ٹیکنیشنز، فارمنگ اور کاشتکاری کے شعبوں میں روزگار کے وسیع مواقع موجود ہیں۔
ترجمان کے مطابق اٹلی یورپ کا پہلا ملک ہے جس نے پاکستان کے لیے باضابطہ طور پر لیبر کوٹہ مختص کیا ہے، جو دونوں ممالک کے درمیان تعاون میں ایک اہم سنگِ میل ہے۔
وفاقی وزیر چوہدری سالک حسین نے اس پیش رفت کو پوری قوم کے لیے خوشخبری قرار دیتے ہوئے کہا کہ طویل محنت کے بعد اٹلی میں پاکستانی ورک فورس کے لیے روزگار کے دروازے کھلنے جا رہے ہیں۔ ان کا کہنا تھا کہ یہ پاکستان کے لیے یورپین لیبر مارکیٹ میں نئے مواقع تلاش کرنے کی جانب ایک اہم قدم ہے۔
انہوں نے مزید کہا کہ حکومت پاکستان اپنے محنت کشوں کو عالمی سطح پر باعزت روزگار فراہم کرنے کے لیے مسلسل کوشاں ہے جبکہ اوورسیز پاکستانی دنیا بھر میں پاکستان کے سفیر اور ملکی معیشت کی ریڑھ کی ہڈی ہیں۔ چوہدری سالک حسین نے امید ظاہر کی کہ جلد یورپ کے مزید ممالک بھی پاکستانی ورک فورس کے لیے اپنے دروازے کھولیں گے۔
ترجمان کے مطابق پاکستان اور اٹلی کے درمیان جوائنٹ ورکنگ گروپ کا دوسرا اجلاس فروری 2026 میں اسلام آباد میں منعقد ہوگا۔
