جوڈیشل مجسٹریٹ اسلام آباد نے بانی پاکستان تحریک انصاف عمران خان کے خلاف 2022 میں کئے گئے حقیقی آزادی مارچ سے متعلق 2 مقدمات داخلِ دفترکرنے کاحکم دے دیا
ڈسٹرکٹ اینڈ سیشن کورٹس اسلام آباد میں بانی پاکستان تحریک انصاف کے خلاف حقیقی آزادی مارچ سے متعلق دو مقدمات کی سماعت ہوئی۔ جوڈیشل مجسٹریٹ اظہر ندیم نے کیسز کی سماعت کرتے ہوئے دونوں مقدمات کو داخلِ دفتر کرنے کا حکم دے دیا۔
سماعت کے دوران عمران خان کی جانب سے وکیل سردار محمد مصروف ایڈووکیٹ عدالت میں پیش ہوئے۔ انہوں نے عدالت کو بتایا کہ یہ دونوں مقدمات 2022 میں درج کیے گئے تھے، جن میں متعدد ملزمان پہلے ہی بری ہو چکے ہیں جبکہ بانی پی ٹی آئی کی بریت کی درخواست گزشتہ دو سال سے زیرِ سماعت ہے۔
وکیل سردار محمد مصروف نے مؤقف اختیار کیا کہ بانی پی ٹی آئی کو اب تک عدالت میں پیش نہیں کیا جا رہا اور عدالت سے استدعا کی کہ یا تو بریت کی درخواست پر دلائل سنے جائیں یا قانونی طور پر مقدمات کو داخلِ دفتر کر دیا جائے۔
انہوں نے مزید کہا کہ عدالت کے پاس قانونی اختیار موجود ہے کہ وہ کیسز کو داخلِ دفتر کر سکتی ہے۔ عدالت نے فریقین کے دلائل سننے کے بعد بانی پی ٹی آئی کے خلاف دونوں مقدمات داخلِ دفتر کرنے کا حکم دے دیا۔
واضح رہے کہ عمران خان کے خلاف تھانہ کوہسار اسلام آباد میں حقیقی آزادی مارچ سے متعلق دو مقدمات درج ہیں۔ ۔
