دنیا بھر میں کروڑوں افراد روزمرہ رابطوں، بینکنگ سروسز، نوکریوں کی درخواستوں اور کاروباری امور کے لیے جی میل استعمال کرتے ہیں، لیکن حالیہ عرصے میں کئی صارفین نے شکایت کی ہے کہ ان کی اہم ای میلز ان باکس میں آنے کے بجائے براہِ راست اسپام فولڈر میں چلی جاتی ہیں۔
ماہرین کے مطابق جی میل کا اسپام سسٹم مشکوک اور غیر ضروری ای میلز کی شناخت کے لیے بنایا گیا ہے، تاہم بعض اوقات یہ غلطی سے اہم پیغامات کو بھی اسپام قرار دے دیتا ہے۔ اس کی ایک بڑی وجہ یہ ہو سکتی ہے کہ بھیجنے والے کا ای میل ایڈریس صارف کی کانٹیکٹ لسٹ میں شامل نہ ہو یا ماضی میں کسی ای میل کو غلطی سے اسپام کے طور پر نشان زد کیا گیا ہو۔
اس مسئلے سے بچنے کے لیے سب سے پہلے اسپام فولڈر میں موجود اہم ای میل کو نوٹ اسپام کے طور پر مارک کرنا چاہیے۔ اس اقدام سے جی میل کو معلوم ہو جاتا ہے کہ یہ ای میل محفوظ اور ضروری ہے، جس کے بعد اسی بھیجنے والے کی آئندہ ای میلز کے اسپام میں جانے کے امکانات کم ہو جاتے ہیں۔
ماہرین یہ بھی مشورہ دیتے ہیں کہ اہم افراد، اداروں، بینکوں یا کمپنیوں کے ای میل ایڈریسز کو گوگل کانٹیکٹس میں محفوظ کر لیا جائے۔ جی میل ایسے ایڈریسز کو زیادہ قابلِ اعتماد سمجھتا ہے اور ان کی ای میلز کو براہِ راست ان باکس میں دکھانے کو ترجیح دیتا ہے۔
اگر کسی مخصوص بھیجنے والے کی ای میلز بار بار اسپام فولڈر میں جا رہی ہوں تو جی میل کے فلٹر فیچر کا استعمال بھی مؤثر ثابت ہو سکتا ہے۔ کمپیوٹر پر جی میل کے فلٹرز میں “نیور سینڈ اٹ ٹو اسپام ” کا آپشن فعال کرکے اس مسئلے کا مستقل حل حاصل کیا جا سکتا ہے۔
ٹیکنالوجی ماہرین کا کہنا ہے کہ صارفین کو وقتاً فوقتاً اپنے اسپام فولڈر کا جائزہ لیتے رہنا چاہیے تاکہ کوئی اہم ای میل نظر انداز نہ ہو اور ضروری معلومات بروقت موصول ہو سکیں۔
