بھارت کے سابق کرکٹر سنجے منجریکر نے روہت شرما کے ٹیسٹ کیریئر پر ایک متنازعہ بیان دیا ہے۔ سنجے مانجریکر کا کہنا ہے کہ روہت آل ٹائم گریٹ بھارتی بلے باز نہیں۔
بھارت کرکٹ ٹیم کے ون ڈے کپتان روہت شرما کو دنیا ہٹ مین کے نام سے جانتی ہے۔ روہت نے ٹیم انڈیا کے لیے خاص طور پر ون ڈے اور ٹی20 فارمیٹ میں کمال کا کھیل دکھایا ہے۔ حالانکہ، ٹیسٹ کرکٹ میں بھی ان کے رن بنانے کا اوسط تقریباً 41 کا رہا ہے، لیکن اس کے باوجود سابق کرکٹر سنجے منجریکر کو ایسا لگتا ہے کہ روہت شرما آل ٹائم گریٹ انڈین کی لسٹ میں فٹ نہیں بیٹھتے ۔
منجریکر نے اس کا سبب ان کے ٹیسٹ کرکٹ میں کارکردگی کو بتایا ہے۔ یہ سچ ہے کہ روہت شرما ون ڈے اور ٹی20 کی طرح ٹیسٹ میں اتنے اثرانداز نہیں رہے، لیکن انہیں جب بھی موقع ملا انہوں نے زبردست کھیل دکھانے کی کوشش کی۔ روہت شرما کے ٹیسٹ کیریئر کی بات کریں تو انہوں نے بھارت کے لیے 67 ٹیسٹ میچوں میں 40.57 کی اوسط سے 4301 رن بنائے، جن میں 12 سنچریاں اور 18 نصف سنچریاں شامل ہیں۔
انہوں نے روہت شرما کے بارے میں کہا روہت بھارت کے آل ٹائم گریٹ کی لسٹ میں فٹ نہیں بیٹھتے۔ کیونکہ ہم بات کر رہے ہیں سنیل گاوسکر، سچن ٹنڈولکر، راہول ڈریوڈ اور ویرات کوہلی کی۔ ‘
تاہم، منجریکر نے محدود اوورز میں ان کے کھیل اور قیادت کی تعریف بھی کی ہے۔ مانجریکر کا ماننا ہے کہ روہت نے ون ڈے اور ٹی20 میں قیادت کرتے ہوئے ہمیشہ اپنی کامیابیوں سے اوپر ٹیم کو رکھا۔ یہ ان کی سب سے بڑی خصوصیت رہی ہے۔ بتا دیں کہ روہت شرما نے اسی پچھلے سال ٹی20 فارمیٹ سے ریٹائرمنٹ کا اعلان کر دیا تھا۔ اس کے بعد اس سال انگلینڈ کے دورے سے پہلے انہوں نے ٹیسٹ کو بھی الوداع کہہ دیا، لیکن انہوں نے ون ڈے میں کھیلنا جاری رکھا ہے۔
