گورنر اسٹیٹ بینک جمیل احمد کا کہنا ہے کہ پاکستان میں مجموعی معاشی استحکام آ گیا ہے ۔
واشنگٹن میں آئی ایم ایف اور ورلڈ بینک کے سالانہ اجلاسوں کے موقع پر عالمی سرمایہ کاروں کی ملاقات کےدوران گورنر اسٹیٹ بینک نے کہا کہ پاکستان میں مجموعی معاشی استحکام آ گیا، اب سرمایہ کاری اور معاشی ترقی میں اضافے کے لیے ماحول بالکل تیار ہے۔۔
گورنر اسٹیٹ بینک کا کہناتھا کہ گزشتہ دو برسوں میں مہنگائی تیزی سے کم ہو کر ستمبر 2025 میں سال بہ سال 5.6 فیصد پر آ چکی ہے آئندہ مہینوں میں مزید کمی کا امکان ہے۔
انہوں نے کہا کہ سیلاب کے باوجود مہنگائی میں اضافے کی شرح درمیانی مدت میں 5 تا 7 فیصد پر مستحکم رہنے کی توقع ہے۔ سیلاب سے نقصانات کے باوجود رواں مالی سال میں حقیقی جی ڈی پی کی نمو پچھلے سال سے زائد رہنے کی توقع ہے۔
جمیل احمد کے مطابق اسٹیٹ بینک کے زرمبادلہ ذخائر فروری 2023ء کے مقابلے میں اب تقریباً پانچ گنا بڑھ چکے ہیں۔ آئی ایم ایف اور عالمی بینک جیسے کثیر جہتی ترقیاتی اداروں کے مستقل اشتراک سے اصلاحاتی ایجنڈے پر پیش رفت جاری رکھیں گے۔
