بھارتی ریاست بہار میں خاتون نے عاشق کے ساتھ مل کر شوہر کو شادی کے 45 دن بعد ہی مبینہ قتل کر دیا۔ اور وہ عاشق کوئی اور نہیں بلکہ خاتون کا پھوپھا تھا۔
بھارتی ریاست بہار کے ضلع اورنگ آباد کے علاقے لمبوکھاپ موڑ کے قریب 24 جون کو پریانشو عرف چھوٹو نامی شخص کو گولی مار کر ہلاک کر دیا گیا تھا۔ ۔ مقتول کی ڈیڑھ ماہ پہلےہی شادی ہوئی تھی۔
پولیس کے مطابق قتل کی تمام کڑیاں سلجھ چکی ہیں اور تمام کرداروں کو گرفتار کرلیا گیا ہے۔
ایس پی اورنگ آباد امبریش راہل نے کہا کہ مقتول کی بیوی گونجا سنگھ اور اس کے پھوپھا جیون سنگھ ایک دوسرے کی محبت میں گرفتار تھے۔ اسی دوران گونجا کی پریانشو سے شادی ہو گئی۔ گونجا اور جیون نے مل کر پریانشو کو ختم کرنے کا منصوبہ بنایا۔
جیون سنگھ نے پریانشو کو مارنے کے لیے کرائے کے قاتلوں کی مدد کا سہارا لیا ۔ 24 جون کی رات جب پریانشو موٹر سائیکل پر اپنے گاؤں بروان واپس آ رہا تھا، گھات لگا کر بیٹھے ہوئے حملہ آوروں نے اسے گولی مار کر ہلاک کر دیا ۔
پولیس نے موبائل سی ڈی آر، سی سی ٹی وی فوٹیج اور خفیہ معلومات کی بنیاد پر گونجا سنگھ، جے شنکر اور مکیش شرما کو گرفتار کیا۔ پوچھ گچھ کے دوران گونجا نے اپنے جرم کا اعتراف کر لیا۔قتل کی اس سازش میں ملوث دیگر مجرموں کی بھی نشاندہی کر لی گئی ہے اور انہیں جلد گرفتار کر لیا جائے گا۔
