وزیر اعلیٰ پنجاب مریم نوازشریف نے نئے ٹریفک رولز کی خلاف ورزی پر اپنے بیٹے جنید صفدر کا چالان کرنے والی ڈولفن پولیس ٹیم کو شاباش دی ہے۔
لاہور میں گاڑی کے کالے شیشوں کی وجہ سے نئے ٹریفک رولز کی خلاف ورزی پر وزیراعلی پنجاب مریم نوازشریف کے بیٹے جنید صفدر کا چالان کیا گیا۔
تاہم حکومتی سطح پر یہ کہا جارہا ہےکہ چالان جنید صفدر کی گاڑی کا نہیں بلکہ ان کے ساتھ موجود سکیورٹی گاڑی کا ہوا ہے۔
سرکاری بیان کے مطابق مریم نواز نے جنید صفدر کے ساتھ سکیورٹی گاڑی کا چالان کرنے والی ڈولفن پولیس ٹیم کے انچارج شاہ زیب، اہلکاروں پرویز، حیدر اور مجاہد کو شاباش دی۔
مریم نواز شریف نے کہا کہ آپ نے قانون کی پاسداری کو یقینی بنایا، قانون کی بالادستی ہی ہماری حکومت کی پہچان ہے۔
انہوں نے کہا کہ پورے پنجاب میں قانون کا یکساں نفاذ اورپاسداری دیکھنا چاہتی ہوں۔
