فیلڈ مارشل عاصم منیر نے کہا ہے کہ فتنۃ الخوارج اور فتنۃ الہندوستان بھارت کے ناکام مہرے ہیں
پاک فوج کے شعبہ تعلقات عامہ (آئی ایس پی آر) کے مطابق 16ویں نیشنل ورکشاپ بلوچستان کے شرکا سے خطاب کے دوران آرمی چیف نے دہشت گردی کے خاتمے کے لیے پاک فوج کے غیر متزلزل عزم کا اظہار کیا
انہوں نے بلوچستان کی سماجی و اقتصادی ترقی کی ناگزیر اہمیت کو قومی یکجہتی و استحکام کے لیے لازمی قرار دیا۔
انہوں نے کہا کہ پاکستان میں دہشت گرد گروہوں کی کھلم کھلا سرپرستی بھارت کی ایک ناکام کوشش ہے۔۔ یہ مذموم کوشش بلوچستان کے عوام کی گہری حب الوطنی کو نشانہ بنانے کے لیے کی جا رہی ہے۔
فیلڈ مارشل عاصم منیر نے کہا کہ بھارت ’معرکۂ حق‘ میں شکست کے بعد اب اپنی مذموم سازشوں کے لیے پراکسی وار کو بڑھا رہا ہے، ’فتنۃ الخوارج‘ اور ’فتنۃ الہندوستان‘ بھارت کی ہائبرڈ وار کے مہرے ہیں۔ دہشت گرد کسی مذہب، مسلک یا قومیت کی حدود کے پابند نہیں ہوتے، اس لیے ان کے خلاف قومی سطح پر یکجہتی اور اجتماعی عزم ناگزیر ہے۔
آرمی چیف نے علاقائی امن کے لیے پاکستان کے عزم کا اعادہ کرتے ہوئے کہا کہ ملک کو درپیش اندرونی یا بیرونی خطرات کا منہ توڑ جواب دینے کے لیے پاک فوج ہر دم تیار ہے تاکہ قومی وقار کا تحفظ اور عوام کی سلامتی یقینی بنائی جا سکے۔
