پاک فوج کےشعبہ ابلاغ عامہ نے کہا ہے کہ ملک کی خود مختاری، جغرافیائی سرحدوں کا تحفظ، آئین کی پاسداری اور قومی تشخص کی حفاظت ہر حال میں افواج پاکستان کی اولین ترجیح رہے گی۔
ملک کے78ویں جشن آزادی کے موقع پر آئیایسپی آر کی جانب سےجاری بیان میں کہا گیا ہے کہ فیلڈ مارشل عاصم منیر ، چیئرمین جوائنٹ چیفس آف سٹاف کمیٹی جنرل ساحر شمشاد مرزا ، نیول چیف ایڈمرل نوید اشرف اورایئر چیف مارشل ظہیر احمد بابر سدھو کی پاکستان کی 78ویں یومِ آزادی کے موقع پر پوری قوم کو دلی مبارکبادپیش کرتے ہیں۔
بیان میں کہا گیا ہےکہ یومِ آزادی ہماری قومی وحدت، استقامت اور روشن مستقبل کے لیے مشترکہ عزم کی علامت ہے۔ اس پرمسرت موقع پر ہم اپنے بانیانِ پاکستان کو خراجِ عقیدت پیش کرتے ہیں ۔
آئی ایس پی آر کے مطابق بانیان پاکستان نے نے قائدِاعظم محمد علی جناح کی ولولہ انگیز قیادت میں آزادی کے حصول کے لیے بے مثال قربانیاں دیں۔ ان مدبر رہنماؤں، بزرگوں اور سپاہیوں کو بھی سلام عقیدت جنہوں نے پاکستان کی بنیاد رکھی اور ایک خودمختار ریاست کا خواب حقیقت بنایا۔یہ قربانیاں آج بھی ہماری رہنمائی کا ذریعہ ہیں۔
بیان میں کہا گیا ہے کہ پاکستان کی خودمختاری، جغرافیائی سرحدوں کا تحفظ، آئین کی پاسداری اور قومی تشخص کی حفاظت ہر حال میں افواج پاکستان کی اولین ترجیح رہے گی۔عوام اور افواجِ پاکستان کا ناقابلِ تسخیر رشتہ ہی ہماری اصل طاقت ہے۔آئیے اس یومِ آزادی پر ہم سب مل کر امن، ترقی اور اتحاد کے لیے اپنی کاوشیں تیز کریں، “ایمان، اتحاد، قربانی” کے سنہری اصولوں کو اپناتے ہوئے ایک مضبوط، خوشحال اور ترقی یافتہ پاکستان کی جانب بڑھیں۔
